ချန်ဂင်တို့စခန်း

ဆယ်ဇင်းကို ပထမတစ်ကြိမ် ဝင်သိမ်းကတည်းက ကိုယ်တို့အဖွဲ့ ဆေးရုံမှာ မအိပ်တော့ပါဘူး။ သူတို့တွေ လေယာဉ် နဲ့ ဗုံးလာကျဲလိမ့်မယ် လို့ သိပြီးသားလေ။ စခန်းတွေသိမ်းချင်လည်း အိပ်မောကျမယ့်အချိန် မနက် ၂ နာရီ ၃ နာရီလောက် လာသိမ်းတတ်တယ် ဆိုတာ သိပြီးသား။ ဆယ်ဇင်းကို သူတို့ လာသိမ်းကောင်း သိမ်းနိုင်တယ် လို့ အစတည်းက တွေးမိလို့ ဆေးရုံကို ဆယ်ဇင်းမှာ မဆောက်ပဲ သည်ဘက်မှာ လာဆောက်ထားတာပါ။ အခု ဆယ်ဇင်းကို သိမ်းပြီဆိုရင် ကိုယ်တို့စခန်းက နောက် ခြေတစ်လှမ်းစာမှာပဲရှိတာ ဆိုတော့ ကြိုရှောင်ထားမှ ရမယ်လေ။ သိမ်းစရာရှိတာ အကုန်သိမ်းပြီး အလုပ်လုပ်နိုင်ရုံကလေး နဲ့ လုပ်နေတယ်။ ညရေးညတာတော့ လုံခြုံရာမှာ သွားအိပ်တယ်။ မနက်စောစောကျမှ ပြန်လာတာ။ လူနာသည်းရင်တော့ ဆရာမလေး […]

စစ်ပွဲတွေထဲမှာ နေရပေမယ့် တခါတခါလည်း အဲ့ဒီစစ်ပွဲတွေကို မေ့သွားတဲ့အချိန် ရှိပါတယ်။ လူနာဆီ ဇောကပ်နေရင် ကျန်တဲ့ဆီ အာရုံတွေ မထွေပြားနိုင်ဘူးလေ။ မနေ့က မိုးချုပ်စပြုမှ လူနာလာပြတော့ ဘာဖြစ်လို့ စောစောလာမပြသလဲ မေးတဲ့အခါ သူက မနက်အစောကြီးကတည်းက ထွက်လာတာပဲ။ အခုမှ ရောက်လို့ပါ တဲ့။ ဆယ်ဇင်းဘက် မျှောထဲကနေ စစ်ရှောင်လာတာ။ ဒီကိုမှောင်မှ ရောက်လို့ ဘုန်းကြီးကျောင်းမယ် တစ်ညဝင်အိပ်ရင်း ဆရာဝန် ရှိတယ် ဆိုလို့ ဝင်ပြတာပါတဲ့။ လူနာက ၉ နှစ်သား ကလေးလေးဗျ။ ဗိုက်ထဲမှာ အလုံးကြီးပေါ်လာတာ ၂ နှစ်ရှိပြီတဲ့။ မိုးညှင်းထိ လည်း တက်ပြဖူးတယ်။ မြစ်ကြီးနား ထိလည်း တက်ပြဖူးတယ်။ မန္တလေးသွားမှ ရမယ် ဆိုလို့ ဒီတိုင်းနေရာက စစ်ပြေးရင်း လမ်းကြုံလို့ ဝင်ပြတာ။ […]

စစ်ပွဲဟာ ဒီဘက်ကို လာမလိုလိုနဲ့ တာမခန်၊ ဖားကန့်ဘက်ကို လည်ထွက်သွားတယ် လို့ ပြောခဲ့ပြီးပါပြီ။ ဆယ်ဇင်းမှာတော့ တိုက်ပွဲတွေ ဆက်ဖြစ်နေတုန်းပဲ တဲ့။ ရဲစခန်းကို သိမ်းပြီး မီးရှို့ပစ်လိုက်ပြီ လို့ ကြားပေမယ့်လည်း အတည်မပြုနိုင်သေးပါဘူး။ ဆယ်ဇင်းမှာလည်း မေးစရာလူ ဘယ်သူမှမှ မကျန်တော့တာ။ တရွာလုံးကုန်ပြီးမှတော့ ဘာဂရုစိုက်စရာ လိုတော့သလဲ။ အကုန်လုံး စိစိညက်ညက်ကျေတဲ့သတင်းပဲ ကြားချင်တော့တာပေါ့။ တာမခန်၊ ဟောင်ပါး ဘက်က ဒုက္ခသည်တွေကိုတော့ နန့်မွန်း၊ ဟိုပင်၊ မိုးညှင်းဘက်ကို ဆက်ရွှေ့ဖို့ ကားတွေစီစဉ်ပေးရပါတယ်။ အဲ့ဒီဘက်က ရွာခံတွေလည်း ပြေးရမှာဆိုတော့ ဒုက္ခသည် အရေအတွက် တော်တော် တိုးပွါးလာမယ့်သဘော ရှိတယ်။ လိုင်းမိတဲ့နေရာသွားထိုင်၊ အလှူငွေတွေ လက်ခံပြီး ဒုက္ခသည်တွေဆီ ပြန်ပို့တဲ့ အလုပ်တစ်ခု တိုးလာပြန်တာပေါ့။ ဒုက္ခသည်တွေနဲ့ အဆက်အသွယ်ရတဲ့အခါမှာလည်း အစားအသောက် […]

တခါတလေတော့လည်း ဘာမှရေးစရာ အကြောင်းအရာမရှိတဲ့ နေ့ရက်တွေဟာ စစ်ပွဲအတွင်းမှာ မင်္ဂလာတစ်ပါး လို့ ပြောရမယ် ထင်ပါရဲ့။ ရေးစရာသာ မရှိတာ လုပ်စရာတွေကတော့ မရပ်မနား လုပ်နေဆဲပါပဲ။ လူနာကြည့်တယ်။ ရေတင်တယ်။ ထမင်းချက်တယ်။ ဈေးသွားတယ်။ နံနံပင်၊ သခွါးသီး၊ ကန်စွန်းရွက်ကအစ တစ်ထောင်တန်နဲ့မှ ဝယ်လို့ရတဲ့အတွက် ကျပ် ၅၀၀ အကြွေလေးတွေဟာ မကဒူး ဟင်းနုနယ်စေ့ဝယ်သလို “လက်ညှိုးနဲ့ တကော်နှိုက်ယူသွား” လို့ အပြောခံရပါတော့မယ်။ ဘယ်လိုတွေများ လုပ်ကိုင်စားသောက်ကြမှာပါလိမ့်။ မနှစ်က ကိုဗစ်လှိုင်းမှာ အောက်ဆီဂျင်တွေ လုသလိုပဲ ဒေါ်လာ၊ ဓါတ်ဆီ၊ စားနပ်ရိက္ခာ၊ ဆေးဝါး၊ အကုန်လုံး သူတို့လက်ထဲရောက်အောင် လုနေပြီ မဟုတ်လား။ စစ်သားကလွဲရင် တနိုင်ငံလုံး ငတ်သေစေချင်တဲ့ စေတနာလေ။ သူမှ အုပ်ချုပ်လို့မရရင် မြန်မာတပြည်လုံး ပြာပုံဖြစ်အောင် လုပ်ချင်နေပုံပဲ။ […]

ညဘက်အိပ်မပျော်စရာအကြောင်းတွေ များပေမယ့်လည်း မနက်အရုဏ်တက်ရင် မထလို့ မရပါဘူး။ ကိုယ့်အိမ်ကိုယ် အိပ်နေတာမှ မဟုတ်တာ။ အလင်းရောင်လာရင် ဆေးရုံမှာ အသင့်ရှိနေရမှာလေ။ တိုက်ပွဲတွေက တဖြေးဖြေးနဲ့ နီးလာခဲ့ပြီပေါ့။ လက်နက်ကြီးသံတွေတောင် အုန်းကနဲ အုန်းကနဲ ကြားလာရပြီ။ အဲ့ဒီဘက်က ရွာတွေလည်း ဒီဘက်ကို စစ်ရှောင်လာနေကြရပြီ။ ကိုယ်တို့အတွက်တော့ မထူးခြားပါဘူး။ ဒူးခေါင်းမှန်ထားတဲ့ လူနာတစ်ယောက် ဒီမနက် ခွဲခန်းဝင်စရာ ရှိတယ်။ မွေးလူနာကို ဘယ်လို လုပ်ကြမလဲ လို့ မမအိုဂျီ နဲ့ တိုင်ပင်ကြတယ်။ due date ကျော်နေပြီ။ ရေမွှာပေါက်ပေမယ့် ဗိုက်မနာသေးဘူး။ သားဦးကိုယ်ဝန်ဆိုတော့ တော်တော်ကြာဦးမှာ။ စစ်က အရမ်းနီးနေပြီ။ မမအိုဂျီကတော့ နာရီဝက်အတွင်း အပြီးအစီး ရအောင်မွေးပေးမယ် ဆိုလို့ ခွဲခန်းဝင်ကြတယ်။ မြန်မြန်ဆန်ဆန်ပဲ ပြီးစီးသွားပါတယ်။ မီးစက်ကလည်း အကြာကြီး […]

ဒီနေ့မနက် သာသနာ့ပါလ ဘုန်းကြီးကျောင်းထဲမှာ ပိတ်မိနေတဲ့ စစ်ဘေးမီးဘေးရှောင် ရွာသားတွေ ထွက်ခွင့်ရပါတယ်။ တာမခန် ဘက်ကိုပဲ ထွက်ခွင့်ပေးတာပါ။ စုစုပေါင်း လူ ၄၀၀ လောက် ရှိပါသတဲ့။ အဲ့လောက်များတဲ့လူအုပ် ဘုန်းကြီးကျောင်းထဲမှာ ဘယ်လိုနေ ဘယ်လိုစား ဘယ်လိုအိပ်ကြမလဲ တွေးကြည့်ရုံနဲ့ကို အင်မတန် စိတ်ဆင်းရဲစရာကောင်းပါတယ်။ ကာယကံရှင်တွေကတော့ မအိပ်လည်း မအိပ်နိုင် စားလည်း မစားနိုင်ဘူး လို့ ပြောကြပါတယ်။ အခုဆို ဗွက်ပေါက်နေတဲ့ အတက်အဆင်း လမ်းကြမ်းခရီးရှည်ကြီးကို လျှောက်ကြရဦးမယ်။ လက်လှမ်းမီရာ အကူအညီတောင်းလို့ရသမျှ ကားတွေ ဆိုင်ကယ်တွေနဲ့ သွားခေါ်ပေးနေပါတယ်။ ကိုယ့်ဆီကို ရောက်လာတဲ့ အလှူငွေတွေကိုလည်း လွှဲပို့ပေးလိုက်ပါတယ်။ လူနာတွေကို ဒီဘက်ပို့ဖို့တော့ လမ်းမဖွင့်ပေးသေးပါဘူး။ ဟိုဘက်မှာလည်း ခွဲပေးမယ့် ဆရာဝန်မရှိတာကြောင့် အရေးပေါ်လူနာလမ်းကြောင်းကလေးတော့ ရွာသားတွေအတွက် ဖွင့်ပေးဖို့ အကူအညီတောင်းထားပါတယ်။ ဟိုဘက်ဆိုတဲ့ […]